| has gloss | nds: Besinners sünd bi en starvende oder dode Spraak de Lüüd, de de Spraak nich mehr aktiv snacken köönt, de sik aver noch op enkelte Wöör un Utdrück oder korte Texten (to’n Bispeel Riemels, Leder oder Gebeden) besinnen köönt. De Besinners gegenöver staht Lüüd, de de Spraak richtig snacken köönt (Sprekers), un Lüüd, de in de Spraak nich mehr würklich tohuus sünd, aver tominnst noch noog vun de Spraak afweet, dat se ganze Sätz tohoopkriegt (Halvsprekers). Bi Spraken, de noch nich lang dood sünd, sünd de Besinners en grote Help för de Spraakwetenschop, dat se tominnst noch wat vun de Spraak opteknen kann. Op de anner Sied sünd se aver ok gefährlich för Spraakwetenschoppers. Dat is faken swoor intoschätzen, woveel disse Lüüd würklich noch weten doot, un dat gifft ok Fäll, dat Lüüd sik bi Interviews mit Spraakwetenschoppers Wöör utdacht hebbt, dat se beter dorstaht oder wenn se hööpt, dat se Geld vun de Interviewers kriegt. De Status as Besinner, Halvspreker oder Spreker is nich fast un kann sik bi en Person ok ännern. Moderspraklers, de jemehr Moderspraak siet Johren oder Johrteihnten nich mehr snackt hebbt, sünd faken blot noch Halvsprekers oder sünd sogor blot noch Besinners. |